بطاقه التموين ؟؟!!

الصورة دى للسجل المدنى فى شبين الكوم – المنوفيه
ودى بالصدفه كنت بخلص ورق هناك وشفت المنظر ده وفى نفس اليوم رحت اخلص ورق فى طنطا لاقيت نفس الزحمه واكتر شويه هناك فى السجل المدنى وقبلها بيوم سمعت من جدى ان فى زحمه برضو فى السجل المدنى فى المنصوره
يعنى كل المحافظات اكيد كدا واكتر وياترى ليه كل دة؟؟!!!

اكيد كلنا سمعنا عن موضوع التموين وان كل اسرة لازم تعمل بطاقه تموين
وعلشان نعمل بطاقه تموين لازم نعمل شهادات ميلاد الكترونيه
طبعا اول ما الناس عرفو الموضوع وحصل هجوم على المصالح الحكوميه
كل الناس بتجرى علشان تلحق تعمل شهادات الميلاد الالكترونيه علشان يعملوا البطاقه التموينيه ...ليه؟؟؟!!!
لان الناس وصلها كلام ان كل حاجه بعد كده هتبقى على البطاقه التموينيه
تقريبا هنعمل زى روسيا ايام زمان
يعنى تسمع اللى يقولك (لا ياعم دة مش سكر و رز وبس دة حتى العيش على البطاقه )
و واحد تانى يقولك ( ياه انت متعرفش دة بنزين العربيه هيبقى على البطاقه )
وكلام كتير بيتقال ومحدش عارف الحقيقه فين
وسمعت تعليق من واحد سواق تاكسى بيقول(تلاقى الحكومه مزنوقه فى قرشين تدفع مرتبات الموظفين فعملوا الحركه دى واهو الشعب هيقول امين )
طيب ياترى ايه الحكايه كل واحد بيسمع من اللى بيقوله وخلاص ومحدش عارف الحقيقه فين
والكل بيجرى علشان يطلع البطاقه وبس من غير مانعرف اصل الموضوع ايه
ولازم طبعا يكون فى شهاده ميلاد الكترونيه علشان الناس تعمل البطاقه دى
طيب اذا كان فى ناس معندهاش شهاده ميلاد اساسا هيعملوا ايه؟!!!!
طيب ازاى مصر كلها 75مليون هيلحقو يعملوا الشهاده الالكترونيه وبعدها البطاقه فى مده محدده؟؟
طيب لو فعلا كل حاجه هتتصرف على البطاقه دى ياترى كيلو السكر وكيلو الرز وكيلو المكرونه هيكفوا الاسرة اللى ممكن توصل 7 ولا 8 افراد؟؟؟
طيب الناس اللى فى العشوائيات هيعملوا ايه ؟؟
طيب واللى مش هيلحق يعمل البطاقه دى موقفه ايه ؟؟

مع ملاحظه طبعاان الاسعار بقت ناااار والتجار رفعوا اسعار السلع فعلا من قبل حتى ما موضوع البطاقات التموينيه دة يشتغل ولا الناس تصرف حاجه بيه
امال لو فعلا الحكومه وزعت كل حاجه على البطاقه الاسعار هيبقى شكلها ايه ؟؟

بجد الواحد مبقاش عارف ياترى الشعب بقى بيجرى ورا اى كلمه بتتقال وخلاص
ولا الحكومه ناويه على ايه
بجد زحمه مش ممكن حد يتخيلها رجاله وستات صغيرين وكبار وشيوخ ومسنين بيفقوا باليومين من غير مايروحوا بيوتهم علشان الموضوع دة
يعنى لما راجل عجوز يبات قدام السجل المدنى فى عز البرد علشان يلحق الصبح مكان ويعمل شهاده الميلاد علشان البطاقه دى
دة يبقى ايه
وكل ده ويا عالم فعلا الكلام الللى بيتقال صح ولا غلط