ياترى اللى بناخدة فى الكليات دة اسمه تعليم بجد؟
او ليه علاقه حتى باسم كلمه تعليم ؟
انا عن نفسى ماظنش
لان هنلاقى الطلبه بتاخد مناهج غريبه مالهاش علاقه بالواقع انا بتكلم بشكل خاص عن كليتى (هندسه-قسم كهرباء)
بناخد مواد عارفين انها مهمه كاسم بس لكن المحتوى فين
يعنى المفروض اننا بعد مانتخرج هنبقى مهندسين نقدر نشتغل فى مصانع وشركات
بس ياترى اللى بندرسه دة بيأهلنا لكدة؟
بصراحه ماظنش
اولا المناهج بعيدة جدااااااااا عن الشغل العملى
وكمان طريقه التدريس نظريه لابعد مدى مفيش تطبيق عملى لاى حاجه اصلا
والمشكله ان مش الطلبه بس اللى حاسين دة
لأ
الدكاترة كمان يعنى تلاقى الدكتور بعد محاضرة ساعتين قاعد يشرح بيقول" ودة طبعا بيختلف تماما عن الناحيه العمليه"
طيب ياترى مين هيعرفنا بقى الناحيه العمليه دى؟
حتى امتحانات العملى (المفروض يعنى بما ان اسمها عملى)
برضو بنمتحنها نظرى وشفوى مفيش عملى دة خاااااااااالص
حتى المعمل بيكون عدد الطلبه فيه كام طول الترم؟
مش اقل من 20 طيب مين هيشتغل ومين مش هيشتغل
دة لو فى شغل بادينا اصلا
لان اى شغل المعيد هو اللى بيعمله لحسن الاجهزة تبوظ
مش عارفه اجهزة ايه اذا كان هو جهاز واحد اللى موجود
وبالرغم من كل دة ان احنا عارفين اهميه المواد اللى بندرسها بس مش عارفين نعمل ايه
وناس كتير بتتخرج وهيا ماتعرفش اى حاجه عن الناحيه العمليه فى الشغل يعنى تقريبا بنسبه(99.99%)من الطلبه
ودة طبعا اكيد من احد اسباب التخلف اللى البلد فيه
ان مش هندسه بس اللى كده
لا وطب
وصيدله
وعلوم
طيب ازاى مستنين البلد يتصلح حالها
ومين اللى هيصلح حالها غير الشباب
طيب اذا كانو اصلا مش عارفين اللى هما بيدرسوه او اللى بيتخصصوا فيه
هيصلحو ايه وازاى؟؟؟؟؟؟؟؟
بجد البلد هيا اللى عايزة تفضل فى التخلف والجهل
دة لا فى اهتمام من الحكومه ولا من جهات التعليم
بدايه من المدرس بتاع الابتدائى والاعدادى والثانوىوحتى دكتور الجامعه
لو لاقينا واحد عنده ضمير هنلاقى عشرة لا عشرين معندهمش ضمير
وكمان الطلبه برضو مشتركين فى دة لانهم بيدورو على الحاجه السهله اللى ميتعبوش فيها
وعلشان كده هنفضل زى ماحنا عمر مافى حاجه هتتغير
وبكده يبقى انت اكيد فى مصر
هناك ٢٣ تعليقًا:
بجد البلوج ده جميل و الموضوع احلى و عندك حق فى كل الالتيه بس هى كده كده مش فارقه لانك كده كده هتتخرج و مش هتشتغل .
سلام
محمد
حسنا
الكلام تمام التمام و كمان الدكاترة بتوع كهربا معقدييييين ده على قد كلام الزملا و ميكانيكا نفس الموال
بس يمكن مدني يكون في الجون شويه لأن احنا بنحتاج الكلام ده و الشغل في الموقع و الاحتكاك بالوقع الكلية بتقول كل واحد على حجر أبوه يعني روح دور على مكان يعلمك تتفاعل مع الأجهزه و الموقع
أما عن الأجهزة اللي بتبوظ فالمفروض عند ناس بيحترموا التعليم و الطلبة يكون في ميزانية للصيانة و التصليح و حتى ميزانية لتعويض تالف الأجهزه
ولا عزاء للمصريين احنا في مصر و الأدهى إننا في كلية هلوسة ربنا معانا
يابنتى هى جت على التعليم بس اللى مش مرتبط بالواقع ما كل حاجه ملهاش علاقه بالواقع
والحاجه الوحيدة المطلوبه منك فى الواقع المصرى انك تقولى نعم من غير لا وتقوليها وانتى راسمه ابتسامه مزيفه على وشك علشان هو دا بقى الواقع بتعنا
كلامك مظبووط يعني الواحد مننا بيدرس حوالي 15 سنه وفي الاخر بيطلع بيلاقي الواقع والحياة العمليه مختلفه تماما عن اللي درسه ...حاجه بجد تحزن
موضوعك مهم وهادف
علي فكرة مدونتك حلوة موووت
و بالنسبه لموضوع البوست ممكن يكون عندك حق
بس ما اعتفدش ان كل الكليات نفس النظام
ممكن عشان انتي في كليه عمليه
لكن انا عن نفسي انا استفدت من كليتي كويس جداااااا
بس انا كنت في كليه ادبيه بحته
لاني خريجه اداب انجليزي
mido_6000
مرسى يا محمد البلوج نور بيك
والله انا كل ماقول زيك انها مش فارقه
الاقى بعد شويه دمى بيتحرق من اللى بيحصل
اعمل ايه بقى
يلا اهى دنيا وكده ولا كده هنعيشها
max.adams
والله انا اكتشفت مؤخرا ان الكليه كلها على بعضها معقدة
من اول الدكاترة لحد الطلبه
اصل العقد هناك بالعدوى
بص هو انا معاك ان الدكاتره عندنا معقدين
وان التفاعل مع الاجهزة منعدم تمامااااااا
بس موضوع الميزانيه
فهيا موجوده
بس فين؟؟؟؟؟؟
العلم عند الله
ولو دورت هتلاقيها بتتسرب فوق
بينهم وبين بعض
امال ازاى هتقدر
يبقى انت اكيد فى مصر
!!!!!!
lonlysmily
لا هيا مجتش على التعليم وبس
انا عارفه
بس بعيد عنك اللى خلانى اتكلم ان امتحانات العملى خلاص
والواحد دمه محروق من كلمه العملى دى
اللى عمرنا ماشفناه
بنسمع عنه بس
على العموم نورت البلوج
ويارب تنورنا كده على طول
rack-yourminds
فعلا الواحد بيدرس فترة كبييييرة
وبيطلع يلاقى الدنيا حاجه تانيه
بس هو كمان بيكون بقى حاجه تانيه
محدش يقدر ينكر
انه بيطلع من التعليم وهو مجهد وطهقان وزهقان من الدنيا واللى فيها ومن نفسه ومن البلد واللى ماسكينها ومن الحياه كلها
دة غير النسبه اللى بيكون جالها اكتئاب وامراض نفسيه
كل دى حاجات بناخدها من التعليم الرائع اللى بتوفرة الحكومه
ربنا يكرمك يا حكومه
وبرضو اقدر اقول
يبقى انت اكيد فى مصر
sally
مرسيى يا قمر
انتى الاحلى طبعا
دة بس من ذوقك
على العموم ممكن يكون كلامى على اساس اللى انا شايفاه
بس برضو الكليات النظريه موضوع تانى
انا اصحابى هنا فى المجمع مبيروحوش كلياتهم اصلا
ولو راحو بيروحو يهزرو مع بعض ويقضو يوم جميل ويروحو
يعنى كده او كده عمااااار يا تعليم
بصى يا ستى
احنا عمالين نقول فى موضوع التعليم ده والمناهج من زمان
بس زمان كانت المناهج ابسط من كده
وكانت بتخرج ناس عظيمه
ليه بقى ؟
فى نظرى
اعتقد ان السبب الاعداد الرهيبه اللى بقت فى الكليات
ده خلى الدكاتره عاجزين عن تطبيق الجزء العملى
يعنى مثلا فى طب
المشرحه هتكفى كام واحد
ولو هتكفى الكل
هيحتاجوا كام جثه
انا ما بانفيش ان المناهج فيها ضعف ونقص
بس لما يتضاف لده الاعداد الرهيبه دى
يكون الناتج هو اللى انت بتتكلمى عليه
يابنتى هو دة الطبيعى
طلبة مصر لو فهموا يعيوا
خلاص اتعودنا على كدة
احنا بنخش الكليات عن نشترى شهادات
ولا اقولك خلى املك فى ربك كبير
تحيااااااااااتى مدونة رائعة
اتمنى الزيارة
جيت اقولك كل سنة وانت طيبة
ويارب يارب تكوني بخير وسعادة
لا تنس فقيراً او يتيماً او محتاجاً في هذا العيد..
لا تنس ان تبادري بالصلح مع من تخاصمين
لا تنس قريب او قريبة بزيارة في العيد
لا تنس كف مرفوع ولسان يستغفر وعين تدمع..مع الله في هذا العيد
تك كير
(:
هاى ازيك
اولا بلوج لذيذ واختيارك لاسمه رائع
ديه اول مرة ازور البلوج واسمحيلى اشارك فى باقى الموضوعات
ثانيا البوست ده مهم جدا لانه بيناقش مشكلة خطيرة ذى التعليم وديه مصيبة من مصايب البلد لان تعليم فاشل يعنى جيل فاشل يعنى مستقبل اسود
وفكرة ان المناهج ملهاش علاقة بالحياة العملية دية مشكلة تانية لانها بتخرج ناس متنفعش تمارس اللى هى اتعلمتة فتلاقى دكتور شغال سواق تاكسى ومهندس بيركب سيراميك ومحاسب شغال ويتر والحياة ماشية
اسف لو طولت عليكى
هذا كلام ما يطلعش غير من مصريه اصيله احبت التطور و التغيير و اصطدمت بحائط مصري اصيل برضه
انا بشد ف شعري وحياتك من الكلام ده كله
انا كان نفسي اتعلم حاجه
انا ف سنه رابعه صيدله و التفاهات اللي احنا اخدناها كلها ماتستاهلش تلات او اربع سنين
ربنا يسترها علينا..و كل سنه و انتم مصريين
shreen
اولا ازيك وكل سنه وانتى طيبه
ثانيا بقى يا ستى موضوع التعليم دة حاجه كده تزهق
اه العدد فى الكليات كتيييييير
بس هنعمل ايه اذا كان الشعب عدده بيزيد
بس برضو الحكومه عليها الدور الاساسى بتطبيقها لنظريه تعليم فاشله
عندك مثلا اليابان شوفى عددهم قد ايه
بس الناس هناك حاجه تانيه خاااااااااالص
انا مش هقر ولا هحسدهم
بس هقول ربنا يخيلكى للشعب يا حكومـــــــه
والله البلد دى اخرتها زى الفـــــــــــــل
ربنا يسترها
مروة الزارع
اولا انتى نورتى البلوج
وكل سنه وانتى طيبه
بصى ياستى احنا اصلا دلوقتى مالناش الا ربنا
هو اللى هيسترها معانا
ومع الشعب الغلبان اللى عمال ياخد فوق دماغه وساكت دة
ربنا يقوينا على ما بلانا
بيتنا القديم
ازيك يا سمسم فينك كده من زمان ؟
وانت طيب وفى احسن حال يارب
وربنا يعوده عليك وعلينا بكل خير يارب
حدوتة
اولا مرسيى لكلامك الجميل
وطبعا انت تنور البلوج فى اى وقت
واكيد يشرفنى انك تتابع اى موضوع
ثانيا بقى بالنسبه لموضوع التعليم انا فعلا شايفه ان فشل البلد دى بسبب التعليم وان المستبقل وبلا فخر هيكون اسوووود
بس النظريه ان دة مش من النهاردة
دة من فترة مش قليله وانا شخصيا شفت فعلا دكتور (خريج طب بشرى يعنى) بيشتغل ويتر
ومهندس(خريج هندسه يعنى)بيشتغل قهوجى
ومهندس تانى (خريج هندسه برضو) بيشتغل سواق تاكسى
يعنى الحدم لله وبلا فخر برضو البلد بدأت تحصد اللى هيا زرعته من فشل
والبقيه اتيه
ربنا يرحم هذا الشعب المطحوووووون
ma7mod so3ody
انا كمان بشد فشعرى
ربنا يستر على الشويه الباقيين
انا كمان كان نفسى اتعلم حاجه
انا الحمد لله دخلت الكليه اللى كنت عايزاها
بس قبلا مادخلها كنت بقعد اقول انا نفسى ابقى مهندسه علشان اقدر افكر وعقلى يشتغل وكنت متخيله بقى ان المهندسيين دول حياتهم كلها تفكير وتشغيل للعقل ومفيش حفظ ولا دش ولا الكلام بتاع الادبى دة (اصلى بكره الحفظ جدااااااا)
المهم
دخلت الكليه وانا كلى تفاؤل ومتوقعه بقى نوع المواد اللى هدرسها كلها
وللاسف فى اول يوم اتصدمت صدمه جااااااامده
اخدت محاضرة 3 ساعات كلها نظرى ومادة بتاعه حفظ فقط
ومن ساعتها وانا فى نفس الموقف
مش عارفه هو ليه الواحد كل مايفكر انه هيلاقى حاجه عدله فى البلد دى تتطلع ...................
على العموم انت نورت البلوج
وياريت تنورنا كده على طول
كل سنه وانتي طيبه وبصحه وبسلامه
وعيد سعيد عليكي
تحياتي وسلامي
rack-yourminds
وانت طيب ربنا يخليك
ويارب يكون عيد سعيد عليك وعلى كل المسلمين يارب
ايه يبت الحلاوه ديه والله بتعرفى تكتبى ايه ياباشا انت ميه ميه
إرسال تعليق